قصة القروية 18

قصة القروية 18

غير نتي غلطتي غلط كبير بزاف 

نعيمة : اشمن غلط؟ ؟

خديجة : راك عارفه الغلط واش عند بالك الحقيقة غاتبقى مخبية العمر كلو؟ ما درتيش بحساب النهار لي غايعرف فيه الحقيقة كيفاش غاتكون حالتو واش غايتقبل الأمر ويسمح ليك؟ ؟

نعيمة :(بخوف ) اش كاتقولي هاد الموضوع سدينا عليه 28 سنة هادي وحتى حد ما عارف من غيري انا وياك والمرحوم الله يرحمو هو مشى عند الله بقيتي نتي لي عارفه ادا منين غايعرف ياكما غاتقوليها ليه إلى مشى حتى عرف عمر وجهي مايتلاقا مع وجهك وعمرني نسمح ليك 

🌳🌳🌳 القرية 🌳 🌳 🌳

قيس : انا تاصلت بالمحامي هو غايتكلف 

بشرى : الله يرضي علي7عع7ققققك و 

لميس : مامي

بشرى : نعام الأميرة ديالي 

لميس : بغيت ماااما 

بشرى : واخا القطيطة ديالي غانمشيو عندها غدا ان شاء الله 

لميس (بفرح )هييييييييي ههههه

زينب : هاهي هاهي على لالة العروسة تي كي درتي ليها كيفاش حتى الحاجة بغاتك لولدها 

مريم : النصيب 

زينب : اممممم ايوا العرس فين غايكون هنا ولا فالمدينة؟ ؟

مريم : فينما كتاب 

زينب : ايوا الله يكمل بخير اجي بعدا داك الطفل لي كان مع راجلك اش كايجيه 

مريم : اولا ماشي راجلي يالا مخطوبين والولد ما كانعرفوش بحالي بحالكم (بتعب ) بغيت نرتاح شوية 

بهيجة : سيري لبيتك رتاحي ليل كلو ما ناعساش 

¤¤¤ بعد مرور أسبوع ¤¤¤ 

بهيجة (دخلات لغرفة مريم ) صباح الخير الالة لعروسة هههههه (باستها فخدها )

مريم : (بتسامة خفيفة ) صباح النور 

بهيجة : باقي ما لبستي طلقي راسك شوية ويجيو 

مريم : بلاتي نصلي بعد 

بهيجة : صلي صلاة الاستخارة (عنقاتها ونزلو دموعها ) الله يفرحك ان شاء الله غاتخلي بلاصتك هئ هئ مانعرف كي غاندير هنا بلا بيك عزيز مشى ونتي غاتمشي هئ هئ 

مريم : راه انا لي خاصني نبكي الحمقة ماشي نتي انا لي غانخلي الدار لي كبرت فيها وغانخلي عائلتي ونمشي لبلاصة غريبة عليا وكن غير كان بعدا سعد مسgد نقولو أح وبردات حتى من ماما لي خاص تكون معايا فهاد نهار ما مايناش يمكن نسات كاع واش عندها شي بنت سميتها مريم توحشت غير بابا الله يرحمو كن كان عايش ماكنتش غانقبل على هاد زواج ديال الدل هئ هئ وتوحشت خوتي إلى تلاقيتهم فالشارع مانعرفهمش نسيت على وجوهم هئ هئ

( دخلات عليهم زينب )

زينب : امالكم كاتبكاو جالسين ف جنازة الناس راه جاو طلقو راسكم 

(مسحات مريم دموعها وبدات كاتوجد نفسها زينب وبهيجة خرجوا من غرفتها وتوجهوا لصالة جلسوا مع بشرى وقيس وسليمان بعد ما لبسات حوايجها وصلاة توجهات ليهم قالت سلام عليكم وجلسات جنب بشرى )

بشرى : بسم الله ما شاء الله (باستها فجبيينها وجبدات من صاكها (حقيبتها ) علبة صغيرة وسطها سنسلة ديال الذهب (عقد ) ولبساتها ليها 

مريم : علاش عدبتي راسك 

بشرى : تستاهلي كتر

مريم (باست ليها يدها ) شكرا 

زينب شافت سنسلة ديال ذهب عينيها خرجو أما سميرة كانت كاتقلى فسمها بعد ما جلسوا شوية خرجوا توجهوا لعند العدو العقد داروه ف الرباط مشات بشرى وسليمان ومحمد خال مريم حتى هو رافقهم سيارة قيس ركبات فيها مدام بشرى ومريم ومحمد ركب مع سليمان بعد ساعات قليلة وصلو للعاصمة الرباط مريم كانت كاتشوف الشوارع من نافذة السيارة نسات همها وسرحات مع الناس بينها وبين رباط مدة طويلة من كانت طفلة صغيرة خرجها من أفكارها صوت بشرى 

بشرى : بنتي وصلنا نزلي

مريم :واخا 

نزلات من سيارة وقلبها ورجليها كايرجفو من الخلعة دخلوا لمكتب العدول جلس قيس وهي جلسات ف الكرسي لي قدامو كان كلشي جاهز خاص غير توقيعهم سألها العدول سؤال وطولات على ما ترد 

العدول : بنتي غانكرر السؤال واش موافقة تزوجي قيس بن محمد العمراني على سنة الله ورسوله بدون اي ضغط أو إجبار ؟؟

مريم :(شافت ف عينين خالها لي ريقو نفش خاف تحشمو ) موافقة 

العدول : رفعي صوتك ابنتي ما سمعتكش 

مريم :موافقة 

العدول : قيس العمراني واش موافق بالانسة مريم بنت مصطفى العلالي زوجة ليك على سنة الله ورسوله ؟

قيس : ( بملامح ما كاتفسرش نطق بصوت خشن ) موافق 

العدول طلب من مريم توقع بعد ما وقعات طلب توقيع قيس وقعوا بزوجهم وولاو زوج وزوجة 

العدول : الله يجعل كلشي مبارك ومسعود برفاه والبنين ان شاء الله

محمد : (سلم على قيس ) مبروك عليكم 

قيس : (بزز كيف العادة ) الله يبارك فيك 

سليمان :(ضمو بحرارة ) مبروك عليكم 

قيس : الله يبارك فيك 

بشرى (ضمات مريم )مبروك عليكم ابنتي والله يرزقكم الدرية الصالحة 

مريم : الله يبارك فيك امين 

سليمان :واش غانبقاو هنا غير نتعانقو يالا نخرجو نحتافلو (شاف ف قيس ) الغدا على حسابك حنا ضياف عندك اليوم ههههههه 

قيس : (بتاسم من تحت سنانو وكايتحلف على سليمان بعنيه ) يالا 

بشرى : هههههههه سليمان كلشي يتفاك معاك حتى لكرشو لا 

محمد :هههه بصحتو 

خرجوا مجموعين ومشاو لمطعم راقي تغداو مجموعين مريم ما قدراتش تاكل غير كاتحط يدها وتهزها وطول الوقت كانت كانتفادى تشوف فوجهو 

🌳🌳🌳القرية 🌳 🌳 🌳 

باركة : مشات دير العقد 

سميرة : ايه الصباح عgبو (مشاو ) لرباط باش دير لكاغط 

العيشورية : هانتي ربي كبير شكون قال غاتاخد راجل بقيمتو وقامتو وباقي صغير فالسن ديالها 

سميرة : هو كبر منها ب 5سنين اخالتي عدو 30 

ميلودة : باقي صغير قد ولدي حمد كايعاودو عليه بنات دوار قالك كدااير بزن (دارت حركة بيدها ) هاك هاك كايفتن 

سميرة :(خرجات عينها )تي كدااير gاعدة طولي فيها تقول هو مهند عااااادي بحال كاع الناس 

العيشورية : كاين شي حد هنا بحالو مالي ماشفتوش نهار جا يخطب كنت واقفة قدام الباب وداز من قدامي 

سميرة : وابعدا كاتعجبيني حتى حاجة ماتفلت لك عسيتي عليه بلا عجز حتى داز بعدا نهار خطبها جا باليل فين شتي وجهو وظلام 

العيشورية : كنت فالكوري وهازة البيل فيدي ومن سمعت حس الطنوبيل خرجت نشوف عرفتهم هما.

فاطنة : (حطات يدها على راسها ) الطيف الطيف كي ردار حتى حاجة ماتفلت لك 

مباركه : انا لي مزال ماشفتو 

ميلودة : حتى العرس ان شاء الله ونشوفوه 

سميرة : لي سمعكم يقول غاتشوفو مهند أهيا ناري 

عواطف : بغيت غير نفهم كي دارت ليها صدماتنا بالمعقول ولي زاد صدمنا دارو العقد دنيا أو شافها مرة وحدة لغد ليه جا خطبها ما كملاش 7 ايام دار معاها العقد اوووو لاواه واخا تكون هي كودالوبي 

سعدية : عندها الحق العجب عندهم هاد شي دغية ياك ما كاينا شي حاجة تما هاد شي ديالهم كايدخل شك 

غزلان : عندكم الصح سألوني انا لي كنت خدامة معاها فالفيرمة كانت تلبس جلابة هنا فالدار وتغطي رأسها زعمة راه محجبة وغير توصل للفيرمة تلوح الزيف من راسها وتحيد جلابتها وتزير فواحد الكسوة وطلق شعرها كي العودة وتبقى غادية جاية وتلوز حداه باش يشوفها وشي مرات كانت تمشي هي وياه لهييييييه ورا الشجرة ليمون وجلسو بسوايع هي ياه وديك القو.....ديال بهيجة كانت غاتغطي عليها وتشجعها حتى طيحوه فالشبكة الله وعلم ومانهزش على تقليدي انا نقول الله أعلم يمكن خسرها ومن زيراتو جا خطبها وتكون كاع ساحرة ليه شكون عرف

سعدية : مدام زربو دغية غاتكون حاملة كاع شكون عرف 

عائشة : شتو الكلبة اش طلع منها كنتوا ضربوا بيها المتل فالأخلاق كاع دوك لي كايتحجبو ويحنيو رأس كايكونو ق.... وهي شافة ديالهم كاع الرجال ديال دوار بغات ضور بيهم ساعة كانت حافظة سواريها كانت كاتشوف بعيد بنت الفاسدة 

سعدية : علاه نسيتوا لطيفة مها فاش كانت قدها كانت غزالة بحالها البيوضة والشعر مسبسب فين واصل والعينين مشيرين وشنايف والخدود كي بلعمان كاع رجال لي فدور طاحوا فيها غير كادوز من قدامهم كايطلقو ريوgهم كي لكلاب حشاكم واخا كانت مزوجة كانت كاتصاحب مع الرجال وتأخذ فلوسهم وغير يمشي مصطفى لخدمتو كادخل الرجال لقلب دارها وف فراش راجلها كان الله يرحمو كايسافر لسبانيا وكايجي جوج مرات ف العام وغير كايمشي كاتعري على قاعها حتى جا نهار لي يفضحها فيه سيدي ربي جا راجلها على غفلة فاليل قال بغى يدرها ليها مفاجعة زعمة (قاطعاتها ) 

غزلان : هههههههههه مفاجأة اخالتي سعدية ماشي مفاجعة 

سعدية :مانعرف ليها انا ماقرياش المهم غير دخل لدار كايلقاها مع بوشعيب لي كان شاف ف وزين سكر تعقلو عليه 

مباركة : ايه نعقلو عليه وعلى داك النهار لي ماتنساش بحال يالا وقع البارح 

مباركة : فاش ناض الصداع والغوات فدارها ناضو جيران ف نص اليل كايفكو كان غايقتلها كن ما رجال جروها من يدو وداك بوشعيب هرب نقز من الحيط لي جيهت الكرمة 

سعدية : خلاها مصطفى كلها دميات غير خرجوه الرجال من الدار هزات ولادها وباتت ما صبحت مريم ديك ساعة كان عندها 5 سنين فالصباح فاش هربات لطيفة كانت هي عند جداها 

مباركة : ودابا من كبرت نسخة على مها غير حانية داك رأس ما دوي مع حد ودايرة فيها بنت دارهم وهي خرج منها العجب 

سعدية : ايوا الله يستر 

العيشورية : ما حشمتو ما راعيتو جالسين تسبو ف عرض البنت بلا حشمة بلا حيا نعلت الله وعليكم انا مجمعكم بارية منو ما قادة على تقليد (نساحبات )

سعدية : اممممم كاتصلي على هيضورت السبع 

محجوبة : (ضماتو بشوق ) الله على ولدي رجع ليا الله ياولدي شحال توحشتك وتشوات كبدتي على غيابك 

نور الدين : (باس رأسها ) حتى انا توحشتك بزاف 

الحسين : علاش ما علمتيناش باش نتلقاو ليك فالمحطة جاي هاز هاد شوانط (الحقائب ) بوحدك 

نور الدين : بغيت نفاجأكم 

سلمى (كاتجري عنقاتو ) خويا الله ياربي شحال توحشتك هههههه

نور الدين : بشوية الحمقة غانطيح انا وياك 

محجوبة : توما خليو الولد يرتاح (جراتو ) زيد اولدي زيد

قصة  القروية, قصة القروية 18, قصة مغربية ساخنة, قصص مغربية بالدارجة ساخنة, قصص مغربية بالدارجة ساخنة ق, 

قصص مغربية بالدارجة ساخنة قصص الحوى بالدارجة المغربية قصص الحلوة المغربية قصص بالدارجة المغربية للكبار قصص حب مغربية بالدارجة,قصص بالدارجة المغربية جريئة,قصص الحلوة بالدارجة,قصص مغربية رومانسية جريئة,

شارك! :