قصة القروية 17

قصة القروية 17

🌳🌳🌳القرية 🌳 🌳 🌳

بشرى : مبروك عليك اولدي والله يرضي عليك 

قيس : امين 

سليمان : عندكم تيتيز هنا كان عند بالي قرطاسة ساعة طلعات قنبولة بووووم هههههه 

(قيس شاف فيه بنفاد صبر )

بشرى : واش وصلتي ل ثلاثين ومزال ما بدلتي كلامك هههه شناهي هاد قرطاسة جالسين وسط الحرب ههه زايدون خاص تحترم مرات خوك وكلمة قرطاسة ماشي من مقامها 

سليمان : هذا هو المصطح لي كايطلق على وحدة جميلة هههههه

فطومة : هذا جيل جديد وجابوا معاهم كلام جديد ماشي بحال ايام زمان 

بشرى : طياب غزال الله يعطيها الصحة 

سليمان : والله ماعندي مانقول طيابها غزال بحالها ناري كاتصرع الدجاج ومذاق البسطلية مزال ف فمي صافي من اليوم الغدا والعشا عندكم هههه

بشرى : مرحبا بيك ههههه 

بشرى : ان شاء الله العقد والعرس الاسبوع الماجي؟ 

قيس : لي بان ليك 

بشرى : واش فينما نهضر معاك تقولي لي بان ليك لي بان ليك؟ ؟ 

قيس (بنفاد صبر ) شنو بغيتي نقولك؟ ؟ انتي لي قلبتي عليها وطلتيها ليا ونتي لي مقادة الأمور لاش كاتاخدي رائي زعمة كايهمك(بتسم بحرقة وستهزاء )ههه ؟ ؟

بشرى (كانت متوقعة ردت فعلوا كمدات فقلبها الكلمات ديالو لي كانوا كيف سم وبتسمات ) كاع العرسان كايتوترو من العرس ماتهزش الهم اولدي انا غانتكلف بكلشي غدا ان شاء الله غاناخد البطاقة ديالها ونعطيها ليك باش توجد وراق العقد والعرس من هنا لشهر كاع باش يالا نوجدو على راحتنا 

(الجو تشحن وتوتر نسحاب قيس ولحق عليه سليمان )

فطومة : يمكن تسرعتي الحاجة ما موافقش بالمرة غير دار ليك الخاطر نخاف هاد الضغط لي فيه يفجرو ف مريم مسكينة 

بشرى : اشنو بغتيني ندير نمشي نقول لناس صافي ولدي ما باغيش الله يجيب ليها ماحسن متلا ؟؟ 

انا عارفاه رافض العيب ماشي فيها فيه هو متعود يسير حياتو بوحدو وبدون قيود ومتعود كلمتو ما تنزلش الأرض ونزلتها ليه وصل لثلاتين سنة ومزال ما بغى يتزوج انا ما ضامناش عمري من هنا لغدا بغيت نطمن عليه ونمشي عند الله وبالي هاني عليه ومريم هي البنت المناسبة هي لي غاتهز هبالو وتصبر ليه فيا ما نشوف ليه صفاء بنت ختي ولا بنت عمو مجدولين ولا اي وحدة من طبقة ديالو ولكن لا حتى وحدة ما تليق ليه 

فطومة : الله يطول ليك فالعمر ان شاء الله وتشوفي ولاد ولادو ولكن شنو لي خلاك متأكدة بلي مريم لي غاتصبر ليه؟ 

بشرى : من نظرة عرفتها لي قبلات تدفن حياتها ف العروبية وهي عندها مؤهلات قادرة تصبر ليه ولي تخلات على طموحها انها تكمل دراستها الجامعية أو حتى تحصل على دبلوم وفضلات تخدم ف المزارع وتعجن المسمن وتبيعو وكاتقاتل مع الزمان قادرة تصبر ليه

ولي جلسات مع دار خالها وسط عائلة كبيرة وما فحالهمش وكاتشقى عليهم بحيت بإمكانها تسكن فالمدينة وتستقل بوحدها وتعيش حياتها بحال قرناتها قادرة تصبر ليه انا ما غانضيعهاش من بين يدي هي املي 

فطومة : كلامك صح الله يهديه على نفسو وعليك ويحل عينيه 

بشرى (تنهدات ) اللهم امي

بهيجة : تي مالك الناس كانو يهضرو ونتي غير ساهية ماسمعنا كاع صوتك؟ ؟

فاطمة : لااا لاا حالها ما عجبنيش مني جلسوا بزوج قبيلة شنو قال ليك حتى تقرصتي وشديتي القنت وصقلتي؟ ؟

بهيجة : عندك الحق من جلسوا بزوج وهي صاقلة فاش هضرتو؟ ؟ 

مريم (نفاجرات بالبكى ) هئ هئ كاع هذا زهر عندي نتزوج براجل كامل مكمول قلت ليكم ما مرتاحاش لهاد زوج وخاطري مزير وقلت ليكم خايفه وخوفي طلع فمحلو قلت ليكم صعيب نكونو بزوج وهو فعالم وانا فعالم آخر كاع تخميني طلع بصح جرحني وهاني فكرامتي هئ هئ انا ما غانقبلش نفرض نفسي على واحد ما بغينيش 

بهيجة : اشنو قالك ماتعصبنيش 

مريم (طلقات لعنان لدموعها وحكات ليهم شنو دار بينهم )

بهيجة : الحمار قليل ترابي اش يسحاب ليه راسو حايرين ف فلوسو 

فاطمة : نعلو الشيطان وخلينا نفكرو بالعقل ورزانة هو مغرور وقريت الغرور ف عينو وكلامو معاها كان قاصح ولكن نعضروه مجبور بحالك نتي قبلتي باش تهربي من كلمة البايرة ومن طغيان مي ودياب لي ضايرين بيك وهو قبل باش يرضي مو كاينا ولا مكايناش 

مريم : الصمت 

بهيجة : هياش ؟ ( هي شنو 

فاطمة : هي ما تسوقش لكلامو مدام قالك غايستافد منك ونتي نفس شيئ هاد الكلمة ما قالهاش من فراغ نتي هو غايستافد منك غايتزوج وتهنى من إلحاح مو عليه صباح وعشيا باش يتزوج ونتي غاتستافدي كتر غاتخرجي من هاد دوار الدوار المنحوس وغاتعيشي فالمدينة عالم آخر وغاتشوفي حياة أخرى حسن من هادي وغاتهزي راسك وتبني مستقبلك 

مريم : (ضحكات ودموعها نازلين ) هه اشمن مستقبل غاندير مع واحد ما حاملش خليقتي واشنو بغيت المدينة وناسها إلى عيشتي غاتكون حارة هنا حسن ليا الف مرة 

بهيجة :فاطمة عندها صح ومتنفاعليش ونقضي راسك الدياب ضايرين بيك وكلاها فين بغى ينهش

ماتحريش فيه ياك مو لي طلبات منك تزوجيه نتي ماتبعتيه وما خيطتي معاه زناقي جا حتى لبابك ودق عليك ستغلي الفرصة وهو يعاودها لحمارتو 

مريم : انتما غير كاتهضرو انا لي غانلوح راسي ف العافية إلى قبلت على هاد الدل واش انا غانتزوج بيه هو ولا بمو كيفاش مانحيرش فيه وهو قالك بغيتو على فلوسو؟ 

بهيجة : فلوسو يبرهم ويطلعهم مع قاعو(اسفة على لفظ ) واش حنا كانشرقو ونتي كاتغربي اش بغيتي بيه هو دريه غير قنطرة (جسر ) غايحميك من لقب البايرة وغاطرطقي عينين العديان واتخرج من هاد القهرة 

فاطمة : قولي غاتخرج من الظلمات إلى النور هههه

بهيجة : سيري الله ينور عليك (وجهات لكلام لمريم ) شتي العقل ورزانة كيفاش كاتفكر نتي ما غاتشديش فلوسو نهار يعطيهم ليك خبطيهم على وجهو عندك الباك ديالك غاتقلبي غلى شي شركة تخشاي فيها وجمعي فلوسك تحت منك حتى يحن عليك الله 

مريم : لوحهم على خليقتو باش يخشي ليا وجهي فشي حيط الشركات ما تخشاو فيهم حتى هدوك لي ب شواهدهم ودبلوماتهم بقيت غير انا أودي خليها على الله لي ماعندو زهر ما عندو انا اصلا عارفه سعدي كحل وما عندي زهر مع البشر نتي تقاديها من هاد جيه وهي تعواج من جيهة لأخرى 

فاطمة : سمعي لكلامي وان شاء الله ما غاتخبيش 

(بقات بهيجة وفاطمة ليل كامل وهما كاينصحو فيها ويقنعوها حتى سلمات أمرها لله )

*** أصبحنا وأصبح الملك لله ***

عائشة :(بصدمة ) لا لا لا لااااااااا ماتgوليهاش ناري ميمتي كي دارت ليها ومنين دازت ليه هئ هئ هئ انا لي تعلق بيه قلبي من اول نظرة وكنت كانتخايل غايجي النهار نعجبو ويطلب مني زواج عاااااااا هئ هئ هئ 

فاطنة :(طلعات معاها بقرصة ) جمعي عليا خناينك الله يلقيها ليك بنات ناس ماضيات ونتي تعجبني غير تخراج العينين ونبيح نهار ومطال كي كلبة دوار اجي بعدا من امتى ونتي تحلمي وفين شتيه

عائشة : البايرة بنت الفاسدة كي دارت حتى جابتو يخطب بغيت ربي لهلا يكمل عليها بغيت ربي يحرق قلبها كيما تحرق قلبي وعمر داك النهار لي تمد يدها الحنا مايجي 

فاطنة : تي فين شتيه تشوفي العما 

سميرة : شافتو فالفيرمة ديالو نيت كان سخرها ولدك هادي هي البايرة إلى بارت على سعدها ضارت وضارت نيت وعرفات اش تجيب عليه كانت تشرط وحتى حد ما عمر عينها قول كانت كاتخطط لضربة الكبيرة ليهودية لي يشوفها حانيا الرأس يقول مسكينة غانية 

فاطنة : قلولها لراسكم بنات الناس يحنيو الرأس ويتمسكنو حتى يتمكنو ويتكلمو بالرزانة ونتما كي كالبات السوق لي سمع نباحكم يقول هنا نبات هاهي داتو سيدي ومولاي وغاتويلي هي القايضة فهاد دورا 

سميرة : وبنت الخماس هي و ديك البايرة ديال فاطمة طمرو وماقالوها لحد قبل الخطبة كانوا يضلو يكركرو بيناتهم ويتغامزو وانا كي ضبعة وسطهم قول هما كانوا كايقادو شغلهم حتى ل نهار لغايجيو يخطبو عاد قالوها وناضو كايتجارو داك الخربة ردوها كاتشعل وطياب ما نقولش لك واخا كاندفع دغمة وكاتوحل ليا اشمنك يا بسطيلة واش منك يالحم واش منك يا دجاج والحلاوي على شكال والعاصيرات بقيت غا حلا فمي تصدمت صدمة خايبة بزاف اميمتي وبنت الخماس هي لي طيبات الحم و الدجاج وقالت ليهم مريم لي طيبات باش تزيد تزينها أما ديك عدوزتي (حماتي ) تسيفات عليا ما عرفتش واش الصدمة لي خلاتها تكركر بحال بوعزة الحمق لي عندنا فالدار ولا طمع لي خلاها ضحك بلا فران 

عائشة : بارك ما تزيدي تفقصي فيا هئ 

فاطنة : وهي اش لبست 

سميرة : تلبس الجدام لبسات واحد القفطان فالباج فالبيض يال سميرة جاها غزال بنت لهم كلشي كايجيها هو هداك ودارت شال فالباج وبلغة فالباج وشوية الكحل وحمرات داك الفم بحال إلى عاضة فخرية حشاكم ولكن رديت البال شي حاجة ماشي هي هاديك

من دخلات عليهم فالأول كانت حانية رأسها حشمانة زعمة وكلامها قليل ولكن ف التالي هزيتي بنت وحطيتي بنت من قراو الفاتحة وركبو الخاتم مشات هي وياه لبيتها .. (قاطعاتها )

عائشة : البيت لااااااش لاش البيت باش تصبح؟ ؟

فاطنة : يصبحوا على بوك الجنون إلى ما سكتي كاين شي وحدة ما تصبح فليلة خطبتها 

عائشة : ديك البايرة لي ملهوفة على رجال توقعي منها اي حاجة 

فاطنة : كانت بايرة دابا عادت مرت الراجل نتي لي برتي ليا هنا 

سميرة : تما خليوني نكمل ليكم كايتراضو كي طعارج قلت ليكم من دخلوا البيت ورجعو تبدلات غير حالة فمها كي المصدومة ووجها تلون وحاسة بيها ما حاملاش رأسها غير كاتشوا وكاتهضر بزز 

عائشة : وهو؟ بغيت خبارو هو شنو كان لابس وشنو قال ؟؟؟....إلخ 

سميرة : كان لابس قاميجة بيضة وكومبلي كحل جا بحال شي ممتل (أشارت بيدها ) هاك كايدير وغير نافخ هاز قنانفو لسما سابعة وسنانو ما شفتهمش ما بغى كاع يهضر كاتهضرو مو بزز كايجاوب على قد سؤال وغير عاقد حجبانو كان معاه واحد خينا حتى هو تيتيز وفيه تقشاب من دخل وهو يهضر كي الببغاء 

عائشة : جلس حداها ياك؟

سميرة : فاللول لا كان هو فقنت وهي فقنت ما شافش كاع ف خليقتها حتى بغاو يركبو الخاتم عاد جلس حداها شربوا الحليب لبعضهم وكلاو ثمر تأكل فيه جغديد وديك البايرة ديال فاطمة كاتصور فيهم أما بنت الخماس ما سداتش داك الفم تقبات ليا ودني بتزغريت 

زينب : مرحبا مرحبا نهار كبير هذا 

بشرى : ترحب بيك الجنة كي صبحتو ؟

زينب : نحمدوه ونشكروه مريم مزال ناعسة؟ 

زينب : لا راها ف السطح كاتنشر شي تصبين بشرى : كلميها ليا الله يخليك 

زينب : هي للولة إيناس طلعي كلمي خالتك مريم

إيناس: واخا 

( طلعات صغيورة فالسطح وكلمات مريم نزلات هي وبهيجة وتوجهوا لصالة سلموا على بشرى وجلسو )

بشرى : جيت باش ناخد لاكارط ناسيونال ديالك باش توجدو العقد 

مريم (غير سمعات العقد قلبها تزير ) بهاد السرعة؟

بشرى : كل ما سرعنا كان حسن 

زينب : كلامك معقول 

بشرى : حنا مزروبين شوية هههه العقد فهاد الأسبوع ان شاء الله وتفاهمت مع قيس العرس من هنا لشهر باش يلا نوجدو ليه 

بهيجة : إلى كان العرس من هنا لشهر خليو العقد حتى لسيمانة لخرا ديال الشهر 

بشرى : لا حتى دابا مزيان 

بهيجة : ولكن غانتفاهمو على واحد النقطة الحاجة واخا يديرو العقد ما غاتمشيش معاه حتى ليلة العرس عاد غاتمشي معاه قدام الناس وما غايمسهاش دابا حتى يسالي العرس وتمشي لدارها هي راه بانت ليا مرفوعة ما غاتركزش فهاد شي كن جا معاك باش نتفاهمو على كلشي 

زينب : خرج ليك العقل ولا باغية تحرزي (تمنعي )البنت على راجلها ولا شنو غايتزوجها بالشرع والقانون وما يمسهاش تزوجها قدام الله وغايخاف يمسها قدام العبد كي درتي ليها 

بهيجة : كايطيح الإيمان أخالتي سبحان الله غا ف المعقول انا بغيت نضمن ليها حقها شكون عرف غدا شنو مخبي ليهم القدر يمسها قبل العرس بشهر والى تنادم معاه الحال قبل العرس وخلاها شرفها يضيع باطل ولا باغية الناس يحلو فامهم ويقولو كان مخسرها من قبل وتزوج غير باش يسترها وابا راه طلقها خصوصا هاد الزواج جا بسرعة كلشي غايبدا يسول علاش وكيفاش؟

زينب : كانو غايجيو يقلبوها واش باقية بنت ولا مرا 

بشرى : هههههههههه بهيجة ومريم بحال الأم وبنتها خليها تقول لي بغات هي خايفه عليها ومقدرة خوفها الله يدوم المحبة انا ابنتي عارفة الأصول ولو الدين حلل الرجل يعاشر المرا معاشرة الأزواج مدام كاين عقد القران ولكن العادات والتقاليد وحتى الخوف ولا كايمنع تكون علاقة قبل العرس كوني هانيا ما غايمسش شعرة منها حتى نهار لي يتسد عليهم بابهم 

بهيجة : مريم راه ختي لي ما ولدتهاش ليا مي ربي يخليك الحاجة ولهلا يحاشمنا 

بشرى : اللهم امين (شافت ف مريم ) مريم ما سمعناش صوتك هذا راه زواجك نتي ونتي لي خاصك تقرري وتعطي رائيك 

مريم : لا كلام بعد كلامك 

بشرى : الله يرضي عليك ابنتي ويكملك بعقلك 

(خدات منها البطاقة وتفاهمو بينهم جلسات معاهم شوية ورجعات لفيلا وهي فرحانة حلمها كايتحقق وفهاد الاسبوع غاتشوف ولدها مزوج

¤¤¤الرباط ¤¤¤

خديجة : سعد بعقلو ماشاء الله غير رخفي عليه وماتبقايش غير تابعاه وتغوتي راه ولا راجل صلى ع النبي 28 عام ماشي ولد صغير تبقاي تابعاه 

نعيمة : هو لي عندي فهاد دنيا وهو نور باش كانشوف إلى وقعات ليه شي حاجة ولا نحارف نمشي فيها لا لا ولدي مابقاش كيف كان ولا عاطيها غير لسهير والخروج قليل فين وليت كانشوفو 

خديجة : مابقاش كيف كان حيت كبر مابقاش صغير

قصة  القروية, قصة القروية 17, قصة مغربية ساخنة, قصص مغربية بالدارجة ساخنة, قصص مغربية بالدارجة ساخنة ق, 

قصص مغربية بالدارجة ساخنة قصص الحوى بالدارجة المغربية قصص الحلوة المغربية قصص بالدارجة المغربية للكبار قصص حب مغربية بالدارجة,قصص بالدارجة المغربية جريئة,قصص الحلوة بالدارجة,قصص مغربية رومانسية جريئة,

شارك! :