قصة القروية 11

قصة القروية 11 

نور الدين : حياتي باش نكونو ديما مع بعضنا ومايفرقنا حتى شي حد كايخص نخرج من هاد الدوار غانخدم ونجمع شوية الفلوس ونجي نديك غانعيش انا وياك فالمدينة وغانبنيو مستقبلنا وغانكون غير انا ونتي (باسها فجبيينها) 

مريم :(ضماتو بقوة ) واعدني ماتعطلش هئ هئ 

نور الدين : كانواعدك احياتي واعديني عمرك تكوني لشي راجل من غيري وغاتسنايني 

مريم :(دارت يدها فيديو ) كانواعدك 

(ضمها لصدرو وقبل جبينها وتفرقو بدموع )

***الحاضر ***

مريم : عطاني العهد وقالي ماعمر شي بنت المرا ماتاخد بلاصتي وقالي غانرجع قبل مايدور العام كان كل نهار يتاصل واليل كامل وحنا نهضرو فالتلفون وسمعني الكلام المعسول فرحني وقالي لقى خدمة فواحد شركة كان كاري مع شي دراري داز عام واستقر بوحدو وقالي كايفرش فالدار باش يجيبني واخا على قد الحال كنت فرحانة داز العام اللول والثاني وتقطعات خبارو وكانتاصل ما كايردش داز العام الثالت وهذا هو العام الرابع ومزال ما شفت وجهو ولا عطاني مبرر ديك المرة لقيت مرات خوه فالسوق وتعمدات دوز من حدايا باش تهضر وقفات وكاتباها بالعباية لي لابسة من سولتها شكون خيطها ليها قالت ليا صيفطها ليها نور الدين راه مشى لخليج وولا شابع فلوس جلسات تسمم فيا بكلامها دنيا ضارت بيا هئ هئ 

(ضماتها بهيجة )

بهيجة : لهلا يرد بوه الحمار لي حطوا دابا تلقاي سيد سيدو اش باغية واحد عروبي ومو مشرارة قاطعة يدها من يد الرحمن كن كتابيتو لبعضهم كانت خاتحرر عيشتك

مريم : حتى بديت كانسى ونتأقلم مع حياتي التعيسة فكل مرة تطلع ليا وحدة وتلوح ليا لكلام واش الرزق فيدي وليت نسمع كلمة البايرة فكل دقيقة 

بهيجة : واش ماعندكش لسان ولا يدك مقطوعين لي لاحت ليك شي كلمة شتفي على مها طفروه هما لي مزوحين ديك بنت الجيعان حسابها معايا هو الخر 

مريم : (مسحات دموعها ) انا شكيت عليك باش نخوي قلبي ماشي باش نوض الصداع الله يخليك ما قادة على مشاكيل 

(قاطعات كلامهم زينب )

زينب : مجمعين هنا وداك العشا شكون ينصبو جيران 

بهيجة : عينا هذا الله جهد تقادة انا ما غانصب شاي ومريم عيات 

زينب :(عوجات فمها ) لسان عندك ماضي الله يخليها سلعة 

مريم : خالتي دابا نصبوا غير هنيونا من صداع ثاني عينا من المشاكيل 

زينب : (بتاسمات وجلسات جنبها ) سعدي ببنتي تشهرات فدوار وعادت كي شميشة عليك طلبات هههه 

مريم : (بستغراب ) مافهمتش؟ 

زينب : الحاجة مرت الحاج الله يرحمو مول الفيرمة عجبها المسمن لي بعتي اليوم وقالت فالصباح جيبي ليها 20ملوية 

بهيجة : هاي هاي هاي على شميشة ايوا شكون بحالك ههه 

مريم (بتسمات ) هه واخا غدا ان شاء الله يكونو واجدين 

فطومة : الصغيورة نعسات 

بشرى : عيات شحال جرات هاد النهار 

فطومة : علاش ماجبتيش ملاك العطلة هادي 

بشرى : راه لميس براسها ماكنتش غانجيبها غير لصقات فينا ملاك خاطرها ضيق كاتعرفي طبعها كيف داير وما كاتبغيش تجي لهنا 

فطومة : باقية صغيرة دابا تكبر وتبدل 

بشرى : الله يصلحهم هاد شي لي نطلبو من الله 

فطومة : اللهم امين 

بشرى (شافت الساعة ) قيس مزال مادخل؟ 

فطومة :مزال 

بشرى : هاد الولد هو لي شاطني امتى يهديه الله ويدير ولادو 

فطومة : واش ماعندو حتى وحدة فبالو

بشرى : شكون عرف فاش كايفكر 

فطومة : هضري معاه وشوفي علاش مطوي 

بشرى : غانحاول معاه إلى هداه الله 

فطومة : الله يهديه 

بشرى : امين 

☆☆☆أصبحنا وأصبح الملك لله ☆☆☆

قبل ماتشرق الشمس فاقت مريم كيف العادة جمعات بيتها وسقات الما من البير وحطبات ونكسات الكوري وعلفات البقر والخرفان وجلسات توجد الملوي لي غاتبيع فاقت بهيحة معاها ووجدات الفطور أما سميرة وكنتها زينب يالا تقلبو على جنب الآخر بعد ما سالاو توجهوا للفيرمة 

دق. . . . دق. . . .دق 

(فتحات بشرى الباب ) 

مريم : (هازة الطبق فوق راسها ) صباح الخير كاين خالتي فطومة؟ 

بشرى : صباح النور ايه ابنتي شكون نتي ؟

مريم : انا مريم وصاتني نجيب ليها الملوي 

بشرى :(بتسمات ) نتي هي مريم ؟! ما شاء الله صلى ع النبي غزالة بلاشك ماعرفتنيش 

مريم (بابتسامة خفيفة ) كانظن نتي الحاج؟

بشرى : ايه الى بغى الله تفضلي بعدا 

مريم : مرة أخرى ان شاء الله تابعاني الخدمة (مدات ليها الطبق ) هذا الملوي لي طلبتي 

بشرى : بسم الله شكرا بلاتي نجيب لك حسابك

19

مريم : مابناتناش 

بشرى : لا لازم تاخدي حقك شحال كاين هنا 

مريم : 20 كيف طلبتي 

بشرى : (مدات ليها 100 )بسم الله 

مريم : بلاتي نرد لك الباقي 

بشرى : لا غير خليه ليك 

مريم : لا شكرا كيف ما خديت حقي لازم تاخدي حقك

بشرى : سمعي لكلام لي كبر منك الباقي هدية مني 

مريم : شكرا مدام رافضة غانرد ليك الباقي ملوي

كاتساليني 30 ملوية ان شاء الله غدا يكونو عندك 

بشرى (ضحكات ) ههههههه واخا الالة 

مريم : (بتسمات ) نهارك مبروك 

بشرى (ردت بابتسامة ) الله يبارك فيك 

"مشات مريم لعند بهيجة وباقي العمال وبداو الجني مجموعين كيف العادة كل واحد ملهي فشغلو سعيد توجه لكازا مع الحمولة كيف طلب منو قيس وقيس وقف على العمال لرفقت العربي رئيس العمال "

قيس : شحال درتي ليهم فالنهار؟ ؟

العربي : 100 درهم هذا هو الثمن بحال كل عام 

قيس : إلى كان ممكن بغيتك تزيد ف عدد العمال باش نساليو بسرعة ماعنديش الوقت بزاف

العربي : هي لي ماتعاودش من اليوم يتزادو 

قيس : انت تكلف بالعدد لي غايتزاد ومن بعد غاتلحق على سعيد انت غاتكلف بالحمولة لي مشات لكازا وهو غايرجع فالعشية 

العربي : واخا ان شاء الله غير نزيد العمال الجداد ونخلص هادو من يساليو ونمشي 

قيس : انت تكلف دابا بالناس لي غاتزيد وسير فين قلت لك انا غانوقف عليهم وغاندفع ليهم خلاصهم بنفسي 

العربي : واخا اسيدي لي بان لك 

¤¤¤الرباط ¤¤¤

الشخص : قيس مسافر كايخص تستعدي يقدر يرجع فأي لحظة الوثائق ديالك قراب يوجدو مهمتي سلات جا دابا دورك 

نسيم : كن هاني غايكون بحالو بحال لي سبقوه ماغانطولش معاه 

الشخص :كانتمنى يوقع هادشي بالتوفيق 

نسيم : ان شاء الله شكرا 

محمد : فين غادية نتي 

عائشة : خويا غانمشي عند سميرة نعاونها فالشقا كي شتي بهيجة ومريم خدمو ف فيرمة الحاج وهي ما عندها لي يعاونها وراني gلتها لبا 

محمد : هي مريم خدمات عند الحاج كاتجني اليمون ههه 

عائشة : اييييه خدمات ودابا خليني نمشي 

محمد :(وقفها ) عندها تلفون ياك؟ ؟

عائشة (شافت فيه بمكر ) لاش كاتسول؟ 

محمد : ماشي شغلك إلى بغيتي نخليك تمشي خاصك تجيبي ليا نمرتها

عائشة : (فرحات لقات سبة باش تمشي لفيرمة ) واخا طلبتي غالموجودة اليلة تكون عندك 

¤¤¤ الرباط ¤¤¤

نعيمة : (شافت ف الساعة ) فين بايت عاد طفات عليك الشمعة كن كملتي نعاسك لاش جاي باقي الحال يالا 8:00 الصباح 

سعد : بديتي ثاني 

نعيمة :(بصوت عالي ) ايه ثاني وثالث وعاشر واش باغي تسكت ليا القلب كل ليلة ساهر ليا فقنت وانا ليل كلو نبات سهرانه ومقابلة الباب هاهو غايدخل هاهو غايدخل شي دخول ماشفتو

سعد : (بعصبية ) الوليدة صباح هذا 

نعيمة : الحمد لله من عرفتي بعدا بلي هذا صباح وعاد داخل 

سعد : (باس ليها رأسها ) سمحي ليا 

نعيمة :(غرغرو عينيها ) الله يهديك اولدي إلى ما دير عقلك راك غادي وكاتكبر ماشي كاتصغار 

نعيمة : ماتخافيش على ولدك 

نعيمة :(ضماتو )إلى ماخفتش عليك علامن غانخاف 

¤¤¤القرية ¤¤¤

العربي : علامن كاتقلبي ابنتي 

عائشة :با العربي اش خبارك؟ 

العربي : من الحامدين والشاكرين 

عائشة :الحمد لله با العربي بغيت نشوف مريم فين نلقاها 

العربي : (اشار لناحية الشجر) غاتبعي هاد الصف حتى لفا ودوري على يدك ليمن غاتلقايها تما(قبل مايكل كلامو وقف عليه قيس ) 

قيس : العربي واحد الدقيقة 

العربي : ايييه 

"مشى العربي وقيس لناحية الثانية وخلاو عويشة بلاك وحالة فمها "

بهيجة : (شدات ظهرها ) الله ياختي باقي يالا بدينا وظهري غايتقسم 

مريم (بخوف ) رتاحي شوية واش ظهرك كايضرك بزاف

بهيجة : لا ماتخافيش غير شوية العيا

مريم (بعتاب ) اصلا اش لي خلاك تقلبي على تامارة عزيز كايتمرمد فالمدينة على قبلك شنو ناقصك 

بهيجة : عزيز يالا مكافي مع داك تريكة الويل لي بلاني بيهم ربي خاص نعاونو شوية واخا نجمع غير شوية الفلوس نلقاهم تحتي من نولد ليام كاطير 

مريم : رخفي على نفسك شوية

قصة  القروية, قصة القروية 11, قصص مغربية بالدارجة ساخنة ق, قصة مغربية ساخنة, قصص مغربية بالدارجة ساخنة, 

شارك! :