قصة القروية 14
مريم :هانا ساليت اخالتي خبار لخير
زينب : خير خير (أشارت ليها ) جلسي هنا
(مريم جلسات وفراسها الف سؤال شنو بغات منها ومال ملامحها جامدة وشوفاتها كي الصقر لي مغدد على الفريسة ديالو )
مريم : مالك اخالتي؟
زينب (سكتات مدة عاد نطقات ) كانت هنا الحاجة يامنة
مريم : ايوا؟
زينب : جات تخطب لولدها
مريم : ههه البشير مزوج
زينب : ماشي ليه لولد الصغير
مريم : (دكراتو ) ااااااه عقلت عليه لي مشى لبرا شحال هادي ايوا الله يسخر شنو دخلي انا فالموضوع؟؟
زينب : (بنفخة )نتي هي الموضوع كلو يامنة جات خطباتك لولدها هو راه ف طاليان وما غايجي حتى لشهر جاي
مريم (بستغراب ) واخا وهاد ولدها فين شافني؟
زينب : ماشافكش وما شي مهم يشوفك بغاتك مو هو ما عندو غرض هاد السمانة الخطبة وغاتجلسي فالدار وممنوع ترجعي تخدمي الشهر الجاي غايجي هو غير يصبح بيك ويرجع لطاليان غاتبقاي تشوفيه من الصيف لصيف وغاتجلسي مع يامنة فالدار عيات وبغات لي يشقى عليها
مريم (مامصدقاش شنو كاتسمع ) لا مايمكنش هاد البشر كيفاش كايفكرو سيد ما شافني ماشفتو وجالسة تخطط شنو غايكون إلى بغات خدامة تمشي للموقف انا ما موافقاش
زينب (علات صوتها ) شنو سبب؟ اشمن عيب فيه واش عند بالك باقية مومو راك شرفتي وبرتي قرناتك ولادهم كاينقزو فالزنقة
مريم (غرغرو عينيها ) ما موافقاش ولي عندي قلتو اش عند بالكم عبدة باش تديني دمر عليا كي الحمار وولدها يجي من العام العام يرمي فيا وسخو ويمشي إلى بغات خدامة دير لبا شهرية ونمشي ندمر من تقلت عليك ولا لالة يامنة بغات خدامة باطل
زينب : تحل ليك الدلقوش ووليتي تشرطي لي بحالك ما خصهاش تشرط راك برتي
مريم :ما غانزيدش كلام آخر لي عندي قلتو (قبل ما تكلم زينب خرجات مريم )
زينب (بصوت عالي ) والله لا كانت لك هو لي غاتدي بغيتي ولا كرهتي
فاطمة : مالك امي محيحة قالت لك الصح مالها شايطة خلي درية على خاطرها
زينب : تخلاي نتي وياها ينعل بوك وبوها غايولي عندي هنا دوار البايرات هو لي غاتدي حيت اصلا ما كاينش من غيرو الكلب ومايساومهاش على فضايح مها قالوها لوالة كفي لgدرة على فمها طلع العروسة لمها شكون غاترضى بيها ومها فاسدة يامنة كن ما كانت باغية تراسه كاع ماqq تجي
فاطمة :(بالغوات ) مي زدتي فيه ربي ما غايسمحش لك عمتي عمرها كانت فاسدة ربي لي عالم شنو وقع حتى طجات ومريم غادير لي بغات ومن يجي با لينا كلام آخر
مريم : سمعتي على ودنيك وليت عالة ومن نهضر على حقي نتعاير الله ينعل الساعة لي تخلقت فيها والله ينعل هاد التقاليد والعادات لي يرجعو القسمة والنصيب بايرة هئ هئ
بهيجة : من كانقولك راها لفعى كادافعي عليها تمشي تزبل هادي دار خالك ماشي حتى دارو دار جدك وحق مك فهاد الدار هنا غاتجلسي على قلب بوهم والى ماعجبهم الحال يخبطو رأسهم ما الحيط نسات يومها بارت حتى عيات كن ما باه محمد عبرها كن راها مزال تنكس الكوري ديال لالياتها
مريم (مسحات دموعها ) سكتي ها العار دابا تسمع نتي ماليك دخل هي كاتبقى مت راجلك عليك بالاحترام
بهيجة : باااااااز لقلبك وباز لدمك شحال بارد مزال كادافعي عليها؟ ؟
فطومة : لميس نعسات بكري ماتعشاتش؟
بشرى : هي ما كاتفوتش الوقت ديالها متعودة تنعس بكري عطيتها البيتزا قبيلة خدات منها شوية صافي
فطومة : ماكلتها قليلة بزاف كاتفكرني ف افنان فاش كانت قدها هههه
بشرى : ايه العمر كايجري
فطومة : كايجري الله يلطف بينا
بشرى : امين ياربي
بهيجة : ديك العقروشة ديال يامنة عند بوها زهر ما كنتش نقي ليها خلخال ودنيها ظل تهتر بداك ولدها فدوار مرات البشير تفكات منها عفا عليها الله من تامارة ومن لقات رأسها غرقات بدات طمع ف بنات الناس ب طاليان عند بالها همة وشان وياك تقبلي عليه غاتعيشي مدولة وحياتك كاملة ترسي عليها وهو يجي من العام العام يحرر عيشتك ويغرقك ولاد ويعلق
مريم : وشنو غاندير نجلس نسمع كلمة بايرة حياتي كاملة وزينب تحرر عيشتي ما باغياهش ولكن غانشوف حتى نعيا ونقول أللهم دل يامنة ولا دل زينب وسميرة
بهيجة : واش خرج ليك العقل ولا هترتي
غاتكون غير ديك الكلبة لي نوضات فيها جعرة إلى بقات فيها يامنة تعطيها ديك البايرة ديال عيشة ولا بغات تلبقك ليها باش تخوا ليها دار خايفاك لا دي ليها رشيد
مريم : بهيجة نتي غير كاتهضري ما عايشاش لي عايشاه انا وما حساش باش كانحس ما جربتيش تعيشي طفولة كلها رعب وخوف وماشفتيش مك كلات قتلة ديال العصى قدام عينيك ونتي صغيرة وما فاهمه والو وما جربتيش تفيقي الصباح تلقاي مك هزات خوتك وهربات من دوار وسمحات فيك هئ هئ ماجربتيش تسمعي بنت الفاسدة باينا غاطلع بحال مها ما جربتيش تفيقي الصباح وتلقاي الصدر الحنين لي دفاك وحماك مشى عند الله وماعمرو يرجع وما جربتيش تسمعي كلمة البايرة الف مرة فالنهار وما جربتيش نظرات الناس ليك شي كايشفق عليك وشي كايسبك وخايفين لا نخطف ليهم رجالتهم مابقى عندي حتى خيار منغير نقبل واخا كانموت الف مرة من كانتخايل غانمشي عند راجل آخر من غير نور الدين وغايمسني راجل آخر من غيرو مجرد التفكير كايدبحني هئ هئ هئ
بهيجة :(ضماتها ) وياك تغلطي ماتقبليش هذا ماشي سبب ونتي غالطة انا حاسة بيك هئ هئ ربي غايجازيك على صبرك وغايجيب �
مريم (بتسمات ) عندها صح شحال قدها تهزني ما كاين لاش دخلي خالي فالموضوع خديت قراري
فاطمة : واش ماهو هاد القرار؟
مريم : (مسحات دمعة نزلت من عينيها ) غانوافق
فاطمة : شنووووو ؟؟خرج ليك العقل من امتى وليتي كادي على كلام مي
مريم : من اليوم وعندها الصح
(بقات بهيجة وفاطمة كايقنعوها تراجع وواعداتهم غاتفكر مزيان عاد غا ترد على يامنة )
☆☆☆أصبحناوأصبح الملك لله ☆☆☆
《كيف كل يوم فاقت مريم بكري وشقات بحال كل صباح وبهيجة وفاطمة معاها كل وحدة تكلفات بحاجة بعد ما سلاو توجهات هي وبهيجة للفيرمة وبداو الخدمة بعد ساعة جا عندها العربي وخبرها بلي الحاجة بغات تكلم معاها سبقها ولحقات عليه وفراسها الف سؤال شنو بغات منها؟ ؟ اكيد على الملوي لي مزال كاتسالها حشمات حيت اليوم ما وجدات ليها والو قاطع أفكارها صوت الحاجة 》
بشرى :(بإبتسامة ) سبحان الله ابنتي فين ساهية
مريم : صبح الخير الحاجة كيف صبحتي
بشرى : صباح النور حمد الله ونتي
مريم : الحمد لله
بشرى :( أشارت ليها ) جلسي
مريم : شكرا (سكتات ومن بعد ستأنفات كلامها ) الحاجة سمحي ليا بزاف والله حشمانة منك
بشرى :(بستغراب ) علاش غانسمح لك؟ ؟
مريم : على الملوي لي مزال كاتسالي هاد شي علاش طلبتي تشوفيني ياك؟ ؟
بشرى :( نفاجرات بالضحك حتى غرغرو عينيها ) هههههههه الله يعطيك الخير ضحكت من قلبي الله ابنتي اش لي خلاك تفكري هاكا (شافت ف عينيها ) لي خلاني نطلب نشوفك موضوع مهم وبغيت ناخد رئيك فيه ونشوف ونسمع ردك وكيف ما كان غانتقبلو
مريم (بخوف وبستغراب ف نفس الوقت ) رائي انا هه فاش؟؟
بشرى : نسولك بعدا واش مخطوبة ولا كاتبغي شي حد؟ ؟ وكاتسنايه؟
مريم : (بستغراب اكتر ) علاش؟
بشرى : جاوبي ومن بعد تعرفي علاش
مريم : (دكرات نور الدين من بعد رجعات لوعيها وقالت مع نفسها عمرو يرجع نساها ) مزال ما مخطوباش وما كانبغي حتى شي حد نقدر نعرف علاش ؟
بشرى (بتاسمات ) مزيان بلا شك كاتعرفي ولدي قيس غاتكوني شفتيه فهاد اليومين؟
مريم :(دكرات توبيخو ليها لبارح ) اه اكيد شكون مايعرفش سي قيس الله يخليه ليك
بشرى : مزيان ندخلو فالموضوع تكلمت معاه البارح بخصوص الزواج جا الوقت لي يدير فيه اسرتو وهو ما فبالو حتى وحدة وطلب مني نشوف ليه البنت المناسبة مزال ما كانعرفوش بعضنا مزيان مي صراحة رتاحيت ليك ودخلتي لخاطري إلى قبلتي تزوجي بولدي غانكون اسعد مرا وحتى حاجة ما غاتخصك معانا عارفة بنات اليوم كايبغيو يعيشو قصة حب ويتزوجو عن حب ماشي بحالنا زمان تزوجنا زواج تقليدي ولكن ابنتي لازم تعرفي بلي الحب كايجي مع العشرة (شافتها مترددة ) خودي وقتك ابنتي ماترضيش عليا دابا حتى تفكري مزيان عاد ردي عليا
مريم : (سكتات ومن بعد تكلمات ) واخا الحاجة نفكر واليلة أن شاء الله نرد عليك
بشرى : ان شاء ا
(خرجات مريم من الفيلا وعقلها حاير وصلات عند بهيجة وهي مرفوعة )
بهيجة : اش بغاتك الحاجة؟ ؟
مريم : الصمت
بهيجة : (مررات يدها قدام عينها ) سبحان الله ابنتي فين ساهية
مريم (قفزات من صوتها ) هااااه
بهيجة : تي مالك ترفعتي
مريم : ماطيحش على بالك شنو بغات مني؟
بهيجة : (باهتمام ) اش بغات ياكما المسمن ديالك عجبها بزاف وبغاتك تخدمي عندها؟
مريم : (تكلمات بصوت شبه مسموع ) بغات تزوجني لولدها
بهيجة :(بعدم تصديق ) تجوجك ولدها؟
مريم (حطات يدها على فم بهيجة ) تي سكتي الفضيحة غاتشوهيني
بهيجة :(بفرح )تي مالنا سايرين نسرقو ربي ربي إلى ما قولي ما كاتفلايش واش من نيتك داوية؟
مريم : ايه
بهيجة : ونتي شنو قلتي اكيد قبلتي؟
مريم : قلت ليها حتى نفكر
بهيجة :( ضربات حناكها (خدها ) اويلي حي واش هبلتي اش غاتفكري واش هذا يفلتوه الناس كان عليك تقولي بغيت ديك الساعة الضبعة
مريم : هذا راه زواج ماشي لعب كيفاش بغيتي نقولها موافقة ديك الساعة غاتقول هادي ملهوفة على زواج اصلا انا ما مرتاحاش بيني وبينك وخايفة بزاف
بهيجة : ما مرتاحاش جاب ليك الله راجل كامل ومكمول وحتى بنت المرا ماتحلم يعبرها وتقولي ما مرتاحاش والمخنن ديال ولد يامنة لي غادمر بيك كي حمار طحونة مرتاحه ليه وهذا لي غايعيشك فالعز لا زايدون منهاش خايفه؟ ؟
مريم : اه ما مرتاحاش فرق شاسع بيني وبينو هو تزاد وفمو معلقة ديال الذهب وانا تزديت فالفقر والقهرة وحتى مستوى ماعندي أما ولد يامنة تزاد فالقهرة بحالي ومستواه نفس المستوى ديالي ما غانلقاش معاه مشكل زايدون خوفي كبر ماشفتيهش اش دار لينا البارح مرمدنا قدام الناس هو باين صعيب و (قاطعاتها )
بهيجة : إلى بقيتي كاتفكرني بهاد الشكل عمرك طفريه فحياتك حيدي منك الخوف ومدام المرا شكراتك وبغاتك لولدها وطلبتها منك بنسفها لاش الخوف ربي حن عليك من عيشت الذل وكاتعفري على نعمة ماعندك لاش تخافي الهبيلة من غاتكوني مرتو ما غايعاملكش بحال البارح والى كان صعيب ساهل تبدليه نتي وشطارتك
قصة القروية, قصة القروية 14, قصص مغربية بالدارجة ساخنة ق, قصة مغربية ساخنة, قصص مغربية بالدارجة ساخنة,
0 Komentar
تعليمات التعليقات