قصة القروية 15
مريم (بتردد ) ماعرفتش خايفه
بهيجة : ميمتي حي غاتخرج ليا العقل واش نتي بقرة ولا ضبعة خليني نفرح بيك ونفقص العديان ههههه والله حتى هو لي غاتدي والى رفضتيه عمر وجهي مايجي فوجهك
مريم :(بخجل ) صافي الفضيحة ولكن خليني نفكر شوية
بهيجة :(ضماتها بفرح ) ماكاين بو تفكار صافي الله يجعل كلشي مبارك ومسعود يالا سيري لدار وصلي صلاة الاستخارة وطلبي ربي يسر لك وحتى انا غانصلي وندعي ربي يكمل بالخير غير هو زمي فمك وحتى حد مايعرف باش ما يضربوكش بالعين الحاجة إلى تبعها لغيط عمرها كاتكمل فاليل ان شاء الله تاصلي بالحاجة وقولها راك موافقة
مريم : ( بتاسمات ) ان شاء الله
سميرة : راه فرعنت فرعنت علاش لي ترفض لاقات ما حسن البنت بارت ومزال تشرط بقاو راخين ليها حتى تجيب ليكم شي عار
فاطمة : غاتسدي دلقوشك لا؟؟ عرفي اش كاتخرجي على فمك ما كاينش لي فرعن قدك
زينب : كادافعي عليها حيت بايرة بحالك الله يتبعكم البلا
فاطمة : با واش عجبوك
محمد : غاتسدو عليا هاد الموضوع ومريم خرجو سوقها وانتي اسميرة ديها فراجلك وولادك ما شغلكش فالباقي
سميرة : دابا وليت نتعاير حيت بغيت مصلاحتها (نزلات دموع التماسيح ) الله يسمح ليك ابا محمد
زينب : ما قالت عيب قالت الصح حتى لين غاتبقى تشرط على الناس راه شرفت ماشي باقية صغيرة ولا الحق ما بغاه حد فهاد الزمان؟
فاطمة : الحق كاتعرفو ليه ( نساحبات )
محمد ( بعصبية ) كلامي ما نتنيهش قالت ليكم خرجو سوقها
زينب : ها حنا خرجنا سوقها طليها بوحدك
♡♡المسااء ♡♡
¤¤¤الرباط ¤¤¤
نعيمة : ليلة ما كاين خروج عيقتي
سعد : ماما ماشي كل ليلة نفس الأسطوانة انا ماشي ولد 10 سنين راه ف عمري 28 ماتبقايش حاضياني طول النهار واليل (بعصبية ) خنقتيني
نعيمة : ياك اقليل الترابي خنقتك حيت خايفه عليك باغي تبع باك شكون لي خرج عليه وصيفطو لقبر؟ هاا ماشي سهير والقصاير واش باغي طرطق ليا مراتي وتصيفطني عندو! !
سعد : ساليتي؟
نعيمة :(بالغوات )ساليت
(خرج ورضخ الباب بدون مايهتم بكلام مو )
¤¤¤القرية ¤¤¤
بهيجة : الله ما كاين ما حسن من الراحة
مريم : عيت حتى انا
بهيجة : يالا هضري مع المرا دابا
مريم : لا زربة على صلاح حتى نفكر بشوية عليا وحتى تسالي مني حق الشهر باش تغسل ونصلي صلاة الاستخارة والى فيه الخير غايكتاب ان شاء الله
بهيجة :غاتاصلي بالسيدة لا؟
غايبقى يتسنى ردك سيمانة كاملة على قلة البنات بقاي حالة فمك كي ضبعة حتى يدوه ليك دابا تاصلي يالا طلقي راسك
مريم (بدلع ) واخا ههههه
بهيجة (ضحكات ) هاكاك نبغيك على سلامتك
ترن. ... ترن....ترن.....
بشرى : الوو
مريم : الوو مسا الخير انا مريم
بشرى : مساء النور ابنتي اش خبارك
مريم : الحمد لله الحاجة ربي يخليك ونتي؟
بشرى : الحمد لله ابنتي
مريم : الحاجة انا موافقة مرحبا بيكم فأي وقت
بشرى : فرحتيني ابنتي ترحب بيك الجنة ونعيمها انا غانتكلم معا ولدي ونشوف الوقت لي يناسبو ونرد عليك
مريم : واخا ان شاء الله
بشرى : غدا ما تجيش لفيرمة
مريم : علاش؟
بشرى : ههههه ويلي على علاش دابا وليتي مرات الراجل واش ماشي عيب تخدمي مع الناس فاليمون ويخلصك بحالهم هههه
مريم : الخدمة ماشي عيب مدام حلال ودوك الناس راني منهم
بشرى : كنتي منه دابا لا الوضع ختلف ماعندناش لعروسة لي تخدم ههههه يالا نخليك ترتاحي فالصباح ان شاء الله نتكلمو
مريم : (بتاسمات ) ان شاء الله هه
(قاطعات الاتصال وشافت ف بهيجة بخجل )
بهيجة : يخلي ليا لي كايحشم هههه والله ماتصوريش شحال انا فرحانه فهاد الحظة صبرتي وربي جزاء احسن جزاء الراجل لي غاتدي حتى بنت المرا هنا ماتحلم بيه (عنقاتها ) مبروك عليك
(دخلات فاطمة فنفس الحضة وسمعات كلمة مبروك )
فاطمة : واش قبلتي بولد يامنة؟ ؟ واش خرج ليك العقل من صباح وانا صوتي بح مع مي وديك الحمارة ديال سميرة ونتي تقبلي فالاخر
مريم : (شداتها من يدها وجلساتها جنبهم ) لا ما قبلتش كنت ولكن من بعد تغير الوضع والى ربي كمل بالخير وكتاب غانتزوج من شخص آخر
فاطمة :(ب هتمام ) شكون؟ ؟
مريم : بمول الفيرمة(المزرعة ) لي خدامين فيها ولد الحاج
فاطمة :(حلات فمها ) شش شنو واش ولد الحاج امتى وكيفاش وشنو قالك هههههه الله ياربي مامصدقاش واش كاتفلاو عليا
بهيجة : بسم الله عليك ههههههه اييييه كيف سمعتي (سدات باب الغرفة وتكلمات بصوت شبه مسموع ) ولكن الجن الحمر مايسمعهاش حتى يحددو النهار غاتسدي فمك وياك تقوليها لمك حتى با حمد بلاش حيت بلا شك غايقولها ليها
فاطمة (حطات يدها على فمها ) وتقول واش تخرج من فمي (طارت على مريم بتعنيقة ) يااااي فرحتيني مبروك عليك يالا دابا عاودو ليا من لول
(عاودات ليها مريم بتفاصيل وجلسو يضحكو بيناتهم زينب وجدات العشا وهي ساخطة على الوضع كانت باغية تهنا من مريم وتلصقها فولد يامنة ساعة رفض مريم عصبها وكمل ليها كلام محمد راجلها حطات العشا وهي كاتغمغم مع نفسها عند بالها غاتبقى لاصقة فيها حياتها كاملة تجمعوا على طابلة (مائدة الأكل ) محمد ورشيد ولدو كايهضرو على الفلاحة وسميرة كاتوكل ولادها وكاتغلي من الأعصاب حيت بهيجة ومريم وفاطمة عينيهم لامعين وطول الوقت وهما كايبتاسمو حسات بلي بينهم شي حاجة زهور كاتاكل فصمت وكاتخمم فحياتها أما زينب كاتغلي وضحك البنات زاد عصبها )
زينب : واش ما غاضحكوناش معاكم نحيدو هاد الغم لي بلتونا بيه من تحطات عاد الدغمة ونتما كر كر كر والو باس؟ ؟؟
فاطمة : اويلي يامي واش ضحك ولا حرام فهاد الدار رجوع الله
محمد : تي اش بغيتي بغيت غا نفهم كل ساعة خاصك تنوضي صداع ضحكوا ما عجبك حال سكتوا ما عجبك حال اش هاد الويل
زينب : علاه مالي اش قلت؟ ؟ قلت يضحكونا معاهم
سميرة : خالتي ما قالت حتى عيب
فاطمة : (ناضت ) خليت ليكم هاد لعشا شبعو بيه
محمد : رجعي بلاصتك وفاطمة تي رجعي (وجه كلامو ل زينب ) عجبك الحال دابا بردتي؟
زينب : ما كاينش لي دسر ديك البايرة قدك علاه انا اش قلت؟
محمد : واش كلشي ردتيه باير طفلة عندها 24 بورتيها نسيتي راسك ولا بغيتي نبدأ نجبد دواصة
زينب (وقفات غاضبة ) من وصلنا لتطياح لكلام ما كاين لاش نطول فالجلاس معاكم (نساحبات )
(بهيجة مشات لعند فاطمة ومريم جلسات مع خالها كاتهدن فيه بعد ساعة كل واحد دخل لبيتو )
☆☆☆ أصبحنا وأصبح الملك لله ☆☆☆
🐞المزرعة 🍁
قيس : ما عنديش مشكل شوفي الوقت لي يناسبك
بشرى : الله يرضي عليك خاص تخطبها قبل ما نرجعو لرباط انت سير جيب الخاتم اليوم وغدا ان شاء الله نمشيو نطلبو يدها هه
قيس ( كتم غضبوا ) ان شاء الله
بشرى : الله يرضي عليك انا غانعلمها دابا
قيس : (وقف ) واخا انا عندي شي شغل ما تسناونيش لغدا
بشرى : واخا اولدي الله يعاونك
(خرج قيس من الفيلا وهو كاعي مي خبا غضبوا باش مايقلقش مو بشرى تكلمات مع مريم وعلماتها بلي غدا فاليل غايجيو يطلبو يدها تكلموا شوية ومن بعد قطعات بشرى الاتصال وتاصالات ب افنان بنتها تعلمها )
مريم : غدا ان شاء الله غايجيو مور صلاة العشا
بهيجة (طلقاتها بتزغريتا الدار كلها سمعتها ) لو لو لو لو لو ي ي ي ي
مريم ( بصوت شبه مسموع ) واش خرج ليك العقل
زينب : (وقفات عليهم ) مالك تزغرتي ياكما خرج ليك لعقل
بهيحة : لا ما خرج لي والو كانزغرت من الفرحة مريم تgعد ليها الميمون وجاها زمانها
زينب : اشمن زمان ياك ولد يامنة رفضاتو شكون هاد منحوس السعد ؟
بهيجة : اشمن يامنة الله يهديك راجلها بقيمتو وقامتو وراه راضية عليه مو لي لقى مريم
36مريم : خالتي ولد الحاج مول الفيرمة غايجي غدا ان شاء الله يطلب يدي علىغاتجبديهم سنة الله ورسوله
زينب : ههههه طلعت ليكم سخانة ظل دمرو فالشمس سيرو الله يجيبكم على خير وحلمي على قدك على قلة البنات فالمدينة غاياخدك نتي على زينك وكيل عيونك (عوجات فمها ومشات )امممم
بهيحة : لا ديش عليها راه تريكة حمقة يالا نشمرو على كتافنا ونكرمو هاد الدار الوقت كايجري الفلوس لي جمعتي من الخدمة والملوي ونزيدك الفلوس لي خديت ولي جامعة وغانوجدو شي شكال ديال الحلوة وبا محمد غايدبح شي خروف باش نوجدو ليهم عشاهم وشي دجاج فالكوري غاندبحو منهم شي ربعة يالا طلقي راسك
مريم : خبي فلوسك ووجدي الولادة ديالك غانحطو ليهم لي قسم الله عارفينا على قد الحال
بهيجة :خرج ليك العقل زيدي قدامي وقطعي الحس
سليمان : لا ماتقولهاش هههههه واخيرا غانحيح ف عرسك والله حتى الحاجة معلمة هههههههه
قيس : (بعصبية ) باركة من ضحك الحامض واصلة فيا حتى لعظم ماعنديش ليك الgانة المهم كيف قلت لك غدا تكون عندي هنا وجيب معاك الخاتم
سليمان : واعره عندك هاد جيب الخاتم اول مرة كانشوف شي عريس كايسخر صاحبو يشري ليه الخاتم هههههه دابا غانخرج نشري لمرات خويا احسن خاتم اجي بعدا مراتك غاتكون تيتيزة بنات العروبية كايكون قرطاس
قيس : ما شفتهاش وما بغيش نشوفها وماتبقاش تقول مراتك مزال ما ولات مراتي كانتمنى توقع شي معجزة وماتكونش
سميرة : تي هادو مالهم صابحين يخملو على نبوري اجي شتهم ما مشاوش لفيرمة ههههههه ياكما جراو عليهم؟
زينب (كاتشرب اتاي ) قالو لك لالة مريم جاين فيها الخطاب غدا
سميرة :(بفضول ) شكون لي جاي يخطب فيها؟
زينب : قالو حقا والواد ولد الحاج مول الفيرمة
سميرة (ضحكات حتى بانو ضراسها ) الواد يديهم دخلنا عليك بالله واش هاد ولد الحاج كلشي ولا يهدرز بيه لدرجة ولاو يتاخيلو جاي يطلب فاليدين
فاطمة : غاتبقاي جالسة لك لك لك لك نهار كامل بلا فايدة
سميرة : فاطمة غاتفوتيني عليك صباح هذا
زينب : آمالك اديك الشطبة غير شاعلة
فاطمة (بحدة) البنت جاين فيها الخطاب والدنيا مقلوبة بالوسخ وجالسين عاطينها لهضور ونميمة إلى مابغينش تعاونوا نوضو خرجو يضربكم البرد
سميرة : وشنو بغيتي نوض نشمر على كتافي ونترس عليكم
فاطمة : شمري غير على لسانك بلعيه وعلى ولادك لي كاياكلو من العين كاع الحلوة نقبوها تقول كانو مربوطين
(جلسات سميرة وفاطمة كايتراضو من بعد خرجات سميرة معصبة وجرات ولادها ومشات تشكي على مها بحال كل مرة )
0 Komentar
تعليمات التعليقات