قصة القروية 10

قصة القروية 10

فطومة : (ضحكات ) ماشي هي هادي مريم لي كاتصايبو من سالات الخدمة باعتو قدام الفيرمة كنت غانشري من عندها ساعة لقيتهم سلاوه هههه

بشرى : تبارك الله عليها مدام كاتبيعو وصيها توجد لينا شي ملويات ههه 

فطومة : ايييه غدا ان شاء الله تفطري بيهم 

قيس : علاش مصدعة راسك من باغية المسمن نرزيرفيه ليك من عند مدام برادة صباح يكون عندك 

بشرى : لا بغيت هذا عجبني 

فطومة : إلى تشتهيه دابا يحضر 

بشرى : (بتسمات )لا حتى لغدا ان شاء الله 

فطومة : ان شاء الله 

سميرة : هي ربحتي مصريف هاد النهار ههه

مريم : الحمد لله 

سميرة : وحتالين غاتبقاي هاكا ما بغاش ديري ولادك غاتبقاي هاكا وتسمعي كلمة بايرة من عند العادي والبادي 

مريم : (حطات الكأس من يدها ) الأرزاق بيد الله وإلى كتاب نبقى بايرة مرحبا راضية بقدر الله 

سميرة (بتسمات بستهزاء ) ايوا لاواه المرة هي لي دير خيمته وولادها ماتفنيش عمرها وهي ترس على ناس ونتي راك وصلتي ل 25 وماعندك حد لي تعولي عليه شحال قد خالك يهز فيك غايجي واحد نهار لي يمشي عند مولاه ايوا؟ ؟؟ (سكتات ومن بعد ستأنفات كلامها بمكر ) هادي داري وحسبيها دارك نتي بنت عمت راجلي وبحال ختو ماعنديش مشكل والله الي عيا هاد الكتف نهزك على هاد الكتف وربي لي شاهد ولكن من كانشوفك التران غايفوتك كاتقطعي ليا قلبي قاطعاتها )

مريم : الزواج بيد الله ماشي بيدي وانا ماشي عديمة ولا معطوبة باش نقطع قلبك بكتافي ونجبدها من فم السبع إلى مشى تران الله يسهل ليه ما غاتوقفش الدنيا عليا والاعمار بيد الله خالي مزال يعيش ويبارك ليه الله فصحتو ولو ما كان هو ما نجلسش هنا (بغات تخرج من الغرفة وقفاتها )

سميرة :جلسي فين نايضة شتي ديما كاتفهمي بالمقلوب

انا اش قلت شي عيب الوجه القاصح حسن من الكداب وانا باغية مصلاحتك باغاك ديري دارك وولادك هادي دار خالك وزينب مرت خالك وولادها ولاد خالك وما كاينش لي يبغيك تبعدي عليه ومنهم انا ولكن خاص تشوفي مستقبلك ومستقبل المرا هو الراجل الى نعرفك مرا وقادة سمعي كلامي وربي لي شاهد باغية ليك الخير عمي عمر خانز فلوس عندو لي يتحرق ما يتم غاتعيشي كي القيدة الرأي رايك وشوار شوارك والى واففتي صداقك مليون والأرض لي جنب الواد

مريم : (بعصبية ) بنت ليك وصلت لخمسين باش تقولي ليا ناخد عمك لي داخل فالسبعين وعندو ثلاثة العيالات من غير لي ماتت ولي طلق انا سلعة تبيعي وتشري فيا (بحدة ) الله يخليك ديها فحياتك ما شكيتش عليك (بغات تهضر سميرة خرجات وخلاتها بلاكا ) 

خرجات من الصالة ودموعها نازلين مسحاتهم بالكم ومشات لبيتها سدات عليها وجلسات تبكي على زهرها العوج وعلى ذل لي وصلات ليه من بعد موت الصدر الحنين لي كان منور حياتها 

زينب : انذرا اش قالت 

سميرة : تقل الجنس الناقص بنادم تحلبي عليه الحليب وهو يحلب عليه السم خلي البايرة تنكس الكوري وتحطب وترس على لالياتها وجها ماشي تاع السترة ولخير 

زينب : تي مالك غير شاعلة اش قالت 

سميرة : مابغاتش وسمعاتني من المنقي خيارو نستاهل على فضولي 

زينب (هزات كأس اتاي وشرباتو ) لهلا خليها ولفات دمير كي لحمار 

غزلان : وهيا ناري وهيا ناري ياخويتي واحد القوق شفناه فالفيرمة (حلات فمها وشهقات )غزااااااااال

عيشة : فين هو حقي تاكلي فيه جغديد بغيتو يطيح لبوك فركابي 

عيشة : يطيح لبوك النجمة لي ضربك ضربك على كرشك انا سايرة نهضر على راجل 

غزلان : اينا راجل ياكما شمش دوخاتك وبان ليك العربي قوق ههههههههههه 

غزلان : اشمنك ياطولة واش منك يافورمة واش منك ياتبوgيصة (أشارت بيدها ) هاك هاك كايفتن حق مولانا 

حليمة : نتي صافي هترتي لا عساك عادي والله حتى راجل عادي بحال كاع الرجال وسمر من الفوق 

غزلان : اش فهمك فالزين باركة عليك داك حناك الغياط لي عندك ربي ربي الى ما جي خدمي معانا غدا وشوفي لقوق لي شفت وخضري ليا عويناتك ههههه 

غزلان : ماكرهتش ولكن با ما غايخلنيش نخدم 

حليمة (كاتعض التفاح وكاتهضر )gالت ليك صح اش ناقصها حتى تخدم 

غزلان : خوي فمك بعدا عاد هضري (وجهات لكلام ل عائشة ) لا عندك لا ديش على هادي راه مردوحة انا غانلقى ليك حل 

عائشة : واخا هانا غدا غانقوليه نمشي عند سميرة ونطرgكم نشوف هاد السيهم القوق واش يستاهل

غزلان :نتفاهمو من هنا وياك تخرجي عينيك بحال ديما وطمعي فالي ماليكش انا غير بغيتك تشوفيه

15

عائشة : صافي صافي بناقص فضحتيني 

بهيجة : فين هي مريم؟ 

زينب : مانعرف حطي داك المشقوف من يدك ودوزي لكشينة نصبي العشا 

بهيجة : قيلت فتامارة ونجي نصب العشا علاه بنت السلطانة اش كدير 

زينب : واش فينما نقولك شقاي دوري ليها علاه شكون لي هز الدار نهار كامل نتي؟ 

بهيجة : اش دارت بسلامة مريم لي حطبات وجابت الما من قاع البير وعجنات وانا حلبت البقرة ووجدت الفطور وجمعنا الدنيا عاد مشينا لجايحة لي ضربنا انا بعدا والله لا داقو شي حد من عندي ايوا صافي غادخلوني الجنة؟ 

زينب : الجنة راك غاتشمي ريحتها على فعايلك الزينين غاتنبحي الله يتبعك لبوكم جهل 

(مشات بهيجة لبيت مريم وخلات زينب كاتنgر )

بهيجة : مالك سادة عليك 

مريم : نتي لي مالك محيحة !!

بهيجة : هاد التريكة ديال الويل لي بلاني بيهم سيدي ربي عند بالهم حنا عبيد قالت لك نصب لعشا لاواه الباكور (شافت ف مريم ) خليك مني مال عينك حمرين حالك ما عاجبنيش ؟

مريم : عيت من هاد العيشة ديال الويل وليت عبئ وحمل تقيل عطاني وعد وعلقني بيه ومشا ربع سنين ضاعت من عمري ربع سنين وانا نقول اليوم يجي غدا يجي ووليت عند ناس بايرة وهم تقيل وولات سميرة تبيع وتشري فيا هئ هئ 

بهيجة : اش قالت لك ثاني بنت الجيعان 

مريم : (مسحات دموعها ) ماشي غير هي كلشي ولا كايهضر وغير ندوز يتهامسو ويتغامزو هاهي البايرة كاتسقي هاهي البايرة كاتحطب شحال قدها تبقى ترس على مرت خالها وزيد وزيد كل نظرة من عينهم كاتدبحني هئ هئ شنو ندير باش نسكت فام ناس كداب منافق علقني بيه ومشى وخلاني هئ هئ 

بهيجة : (جلسات جنبها ) واش خرج ليك العقل ولا يالا غايخرج شكون هاد الناس لي رافدة ليهم الهم بنت المقمل نسات البايرة لي عندهم فدار شكون فيهم هنا لي مزوجة زواج يفرح إلى كان غير زواجهم الله يخليه علاه مالك درتي العكاز 25باقي ما دخلتي ليها زعمة راك قارية وواعية 

مريم : اختي الصبر كايضبر 25 مابقى والو ونقفلها والعمر كايجري فوزية بنتها عندها 15 تزوجات وسلمى بنت سلاام عندها 18 راه مزوجة وعندها زوج ولاد ولبنى بنت فاطمة عندها 16 راه مزوجة وعندها بنت وسميرة قدي قدها وعندها ثلاتة ديال الولاد ومانمشيوش بعيد انتي قدي قدك وعندك بنت وحاملة وولدتي إيناس على 18 وانا لي دق بابي كنت نردو على قبل سيهم نور الدين كنت نحلم يجي النهار لي نتجمعو فيه وكنت نضحك على راسي ونقول غانتجمعو ان شاء الله ساعة مشى وشاف حياتو وخلاني هنا مانسمع كلام لي يسوى ولي مايسواش هئ هئ هئ

بهيجة : الأرزاق بيد الله ورزقك غايجيك ان شاء الله نتي غزالة تبارك وقارية والف واحد يتمناك نتي لي دافنة راسك بين الكوري والكشينة خرجي من هاد الدوار الملعون وشوفي واش غاتبقاي بلا زواج زايدون الزواج ماشي هو كلشي كن انا منك كن كاع مانتزوج كن طجيت من هنا ماتسمحيش ليدك العقروشة ديال محجوبة هي لي فرقاتكم كن ما سم والحقد لي فقلبها كن راكم مزوحين وبولادكم الله يتبعها البلا

مريم : (مسحات دموعها ) الله يسمح ليها ديك اليله لي كان مسافر فيها ماتنساش ليا هئ هئ عنقني بقوة وقالي كانواعدك غانرجع ونديك من هنا و. ..هئ هئ (ضمتها بهيجة )

***قبل أربع سنوات ***

محجوبة : ياك غابنت لطيفة والله لا كانت ليك مخلي بنات الأصل والمفصل وباغي تاخد بنت الفاسدة ياك مها حصلوها مع راجل فقلب بيتها باغي تجيب ليا ملقوطة مها كاضرب لقراعي فبلادك الكفار

نور الدين : (بعصبية ) الله يهديك الحاجة اش بغينا مها انا حاجتي ف مريم والماضي ديال مها ماعندي دخل فيه البنت كانبغيها وهي كذلك وراضية تعيش فهاد الدار ومعتبراك فمقام مها اش باغية كتر؟ ؟

محجوبة : لهلااااا يحيها ويحيك اقليل الأصل كاتقارني مع فاسدة كلامي ما غانتنيهش والله لا كانت ليك (حيدات درتها من رأسها ونتفات نوادرها ) والله لا خدتيها ها سخط ها رضى ختار اش بغيتي 

نور الدين : الله يهديك امي مالك على هاد قصوحية القلب اش دارت ليك البنت وشنو دنبنا ف ماضي مها لاش باغية دمريني واش انا ولدك ولا عدوك 

محجوبة : والله لا زدت معاك الكلمة ثاني هاسخط ها الرضا ختار اشمن طريق بغيتي (هزات درتها من الأرض وخرجات )

***بعد مرور أسبوع ***

مريم :(بستغراب ) لاش مخرجني فهاد اليل إلى شافني خالي يدبحني (بخوف ) لاش هاز هاد الصاك (الحقيبة ) فففين غادي؟ ؟

نور الدين (حط الصاك فالأرض وشد يدها بين يدو ) حياتي ماتصوريش شحال كانبغيك ومستحيل نتخيل حياتي بلا بيك 

مريم : (شافت ف عينيه ودموعها نازلين ) حتى انا كانموت عليك وما قادراش نتخيل حياتي بلا بيك هئ هئ 

نور الدين :(ضمها لصدرو بقوة ) حياتي غانخليك مدة صغيرة ونرجع واعديني عمرك تكوني لغيري 

مريم : (بعدات من صدرو ودموعها شلال وصوتها كايرجف ) ك كككك كيفاش غاتخليني فين باغي تمشي هئ هئ مايمكنش تخليني بوحدي هئ هئ 

نور الدين : حياتي ياك نتي باغيانا نكونو بزوج طول العمر وحتى حد مايفرقنا 

مريم : (مسحات دموعها وترمات فحضنو ) اكيد

قصة  القروية, قصة القروية 10,قصص مغربية بالدارجة ساخنة ق, قصة مغربية ساخنة, قصص مغربية بالدارجة ساخنة, 

شارك! :